الترجي في آخر معين الشعباني
بالرغم ضعف البطولة متعنا الا و لقينا مشاكل ضد جمعيات تضحك
كيف النادي البنزرتي في المنزه
و ضد بن قردان في المنزه
ضد باجة في رادس و تعادل كونتر الافريقي و هيا تلعب على الطيوح
خسارة في الكوب كونتر النجم في رادس و اول مرة تربحنا في تاريخها في العاصمة
دوري أبطال أفريقيا بعد الترشح اللي بهدف تسلل كونتر الاتحاد بنغازي و بالبونية ترشحنا
دوري المجموعات ربحنا فريق كامروني اول مرة يشارك بالقوة و ربحتنا في الكامرون و طرحين الزمالك اللي تحلى فيهم العين
بعد ترشحنا على بلوزداد بالغصرة
بعد نخسرو كونتر الاهلي ذهاب و إياب
هذا نعرفو اللي انت تعرفهم المعلومات هاذم اما حبيت نذكرك في آخر نتائج متع الترجي غير انو خسرنا كوب كونتر صفاقس و ربحنا القلعة الكبري في آخر دقيقة
باهي نجو لصحيح تو
بعد خسارة الاهلي ذهاب و إياب الترجي كانت تحمد ربي و زيد ما دخلت في حيط أكثر لا مدرب لا إدارة خرجت و وضحت و لا انتدابات و لا ملاعبيا تضرب شهر و البارك مسكر تقول نادي هواات
المفيد رجعو الملاعبيا يترنو من غير مدرب تقوم الإدارة تعمل انتدابات قبل المدرب و بعد تقول اللي راضي الجعايدي هو المدرب الاول للفريق و لهنا راضي غلط كيف قمر و قبل في الحالة هذيكا
جاء الجعايدي يلقي جمعية بدنيا طايحة ذهنيا كيف كيف حتي الملاعبيا موش يكلمو في بعضهم و لا ميركاتو كيف ما يحب هو تو بش نهرب بيك شوي بش تنجم تفهمني
فما مدربين في العالم ما تنجمش تبدللهم فكرهم و طريقة لعبهم كيف مثال كونتي مدرب توتنهام مهما يصير ديما التشكيلة متعو 3/5/2
كيف مثال انشيلوتي 4 / 3/3
كيف مورينهو 4/2/3/1
فما مدربين ديما نفس التركيبة لكن في الملعب اكيد فما ملاعبيا بش تتغير الأدوار متعهم
يقول القايل اش مدخل موضوع الجعايدي في المدربين هاذم
شد عندك راضي الجعايدي التركيبة المفضلة ليه و الطريقة اللي لعب بيها في بلجيكا و في أمريكا هيا 3/5/2 او 3/4/3
جاء لقاء effectifs موش اللي يحبو هو يلزم اظهرة في المستوي و يطبقو الفكر متعو و لا ظهير من الاظهرة اللي عدنا كانو ينجحو في التركيبة متع 3/5/2 بما فيهم الشتي اللي ابرك حال منهم لكن المواصفات اللي في الشتي موش في قيمة الفكرة المطلوبة لانو ضعيف في التغطية و الخ....
منغير ما نحكو على بن حميدة و الفادع و المشموم اللي ميمشوش في اي تركيبة لفريق في حجم الترجي
زادة يلزمك مدافعين ثلاث او أربعة في نفس المستوي
و فوق هذا يلزم زوز مهاجمين مختلفين كليا واحد هداف و الاخر يكون عندو أكثر من دور على سبيل المثال كيف ابراهيما واتارا
احنا في وقت الجعايدي عدنا المرزوقي و كوناتي كانت مشكلتو واضحة و برنسيس بوها اللي مستوه يضحك و شكون جابو لترجي
بالرغم من هذا راضي الجعايدي تلز و بدل فكرتو و رجع ل 4_3_3 و بدل فيها برشا حاجات كيف دور كوليبالي و بن رمضان و غيلان
منغير ما ننسو الترجي متع الجعايدي خرج منهما بن غيث و حمدي النقاز و الخنيسي و وليام توغي و خالد عبد الباسط و عبد الرحمن مزيان.
باهي نتجاوزو الحاجات هذي الكل و راضي الجعايدي بداء يخدم بشهادة الجميع
الترجي بدنيا طور و برشا ملاعبيا طورو معه خاصة بن رمضان اللي زادة مع الجعايدي التهديف أكثر و خرج هداف دوري أبطال أفريقيا و محمد أمين توغاي و الشتي و الهوني رجعتلهم الثيقة و غيلان اللي كان بناك مع معين رجع مع الجعايدي غيلان 2018
الترجي كمل الاول في دور المجموعات و كان هو أكثر فريق خالق فرص و الناس الكل قالو الترجي مختلف السنا على السنين اللي فاتو
ثاني أكثر فريق تسجيل لأهداف بعد الوداد و اقل فريق قابل يعني الاقوي دفاعيا
المفيد الترجي كان احسن فريق يفرج كورة و المدرب يقوم بالدور متعو كل مباراة توصل ل 18 متر المنافس موش هو بش يهبط يقول ل ايدو و الا ايوالا هاكا تشوط الكورة
طرح سطيف اللي قلب كل شي بعد ما ضيعنا الترشح من الدزاير ايدو راس راس و بن رمضان كيفو و الفادع الشبكة فرغانة ضيعها الخ.......
طرح مستير في مستير بن حمودة وحدو مضيع ثلاث بونطو
الهوني الشبكة فرغانة حطها في ظهر المدافع
الملاعبيا بلوغتنا موش متع الخدمة هذيكا و فدو من التصرفات متع الانجليز ههه أخصائي في الماكلة و وقت لنوم محدد و تترنا صباح و عشية و انضباط و كذا
لذلك عملو معه الخايب و طيحوه طرح مساكن اللي حتي منغير مدرب نربحوه
المفيد الجعايدي لا نعرفو لا يمدلي في فلوس لا هم يحزنون
مدرب فيه سلبيات كيف اي مدرب في العالم و عندو اغلاط كيف اي مدرب في العالم
لذلك تمنيت أنو يواصل و ياخذ فرصتو كيف ما خذا أربعين فرصة معين الشعباني
الله غالب و اكهو انشالله السنا نهزو الخامسة مع معلول